Во овој научен симпозиум што се одржа во чест на творештвото на проф. Др. Себахатин Заим, министерот Чупи одржа говор, кој во целост го пренесуваме во продолжение:

Почитуван градоначалник на општина Штип, г. Иван Јорданов, почитуван заменик министер за образование и наука д-р. Лулзим Алиу, почитуван заменик министер за култура г-дин. Даим Лучи, почитуван Ректор на Државниот Универзитет на Чанаккале, 18 март, проф.д-р. Седар Мурат, како и сите останати присутни на овој Симпозиум.

Се собравме тука да одадеме почит на ликот и делото на проф. д-р. Себахатин Заим, како значаен член на нашата дијаспора кој се родил во Штип а дејствувал во Турција.
Проф. д-р. Заим бил голем човек, интелектуалец, угледен економист и ценет академик, со вложен огромен труд во делот на науката и препознатлив автор со богат научен опус, кој оставил траен печат во науката од областа на економијата, каде што денеска по неговото име има и универзитет во Турција. Со други зборови, тој е истакнат член од нашата дијаспора со кој сите ние се гордееме.

Како министер во Владата на РСМ задолжен за дијаспора, основна цел ми е секогаш да останеме верни на нашите корени, следствено, клучен дел од националната стратегија за дијаспора ми е мапирањето на научната дијаспора, за научници како проф. д-р. Заим да бидат истакнати и запаметени во историјата на РСМ, да се одбележат нивните успеси и да бидат мотивација за помладите генерации.

За крај, сакам да потсетам дека во август е 30 годишнина од воспоставување на дипломатските односи меѓу Република Северна Македонија и Република Турција и токму вакви истакнати личности на нашата дијаспора се мотивација за да продолжиме со заложбата за зачувување на пријателските билатерални односи и да ги зајакнеме врските меѓу нашите народи.

Овој научен симпозиум е мал скромен чин за Проф. д-р. Себахатин Заим засекогаш да остане запаметен.

Ви благодарам!